LUNGSOD NG MALOLOSย โ Habang papalapit ang panahon ng tag-init at ang paggunita ng Semana Santa na inaasahang dadaluhan ng libu-libong mga turista at manlalakbay sa lalawigan, naglabas ng paalala ang Pamahalaang Panlalawigan ng Bulacan sa pamamagitan ng Provincial History, Arts, Culture and Tourism Office (PHACTO) upang hikayatin ang mga bisita na pairalin ang kaligtasan, pananagutan, at paggalang habang tinutuklas ang mga makasaysayan, kultural, at pook-peregrinasyon sa lalawigan.
Dahil sa inaasahang pagdagsa ng mga babiyahe at turista, pinapayuhan ang mga bisita na maging maingat sa matinding init ng panahon sa pamamagitan ng pananatiling hydrated at pagdadala ng reusable na bote ng tubig sa kanilang paglalakbay. Inirerekomenda rin ang pagsusuot ng magaan at kumportableng damit, paglalagay ng sunscreen, at paggamit ng mga pananggalang tulad ng sumbrero at sunglasses upang maiwasan ang mga sakit na dulot ng init. Pinapaalalahanan din na iwasan ang matagal na pagbabad sa direktang sikat ng araw, lalo na mula alas-10:00 ng umaga hanggang alas-3:00 ng hapon kung kailan pinakamataas ang temperatura.
Hinihimok din ng PHACTO ang mga turista na sundin ang mga lokal na alituntunin at safety protocols sa mga pook-pamana, simbahan, dambana, at mga likas na atraksyon sa buong lalawigan. Inaanyayahan ang mga bisita na igalang ang lokal na tradisyon at panatilihin ang wastong asal, lalo na sa mga sagradong lugar at kultural na pook. Mahigpit ding hinihikayat ang pagpapanatili ng kalinisan at wastong pagtatapon ng basura sa lahat ng lugar panturismo upang mapangalagaan ang mga yamang pangkasaysayan at pangkalikasan ng Bulacan.
Para sa mga peregrinong bibisita sa Bulacan ngayong Semana Santa, inirerekomenda ng PHACTO ang sapat na paghahanda sa mga gawaing panrelihiyon sa pamamagitan ng pagsusuot ng kumportableng sapatos at pagdadala ng mahahalagang gamit tulad ng basic first-aid kit, power bank, at panangga sa ulan. Samantala, hinihikayat ang mga bumibisita sa mga museo, makasaysayang pook, at heritage districts na maglaan ng oras upang pahalagahan ang mayamang pamana ng lalawigan habang sinusuportahan ang mga lokal na inisyatiba sa turismo.
Inaanyayahan naman ni Limuel Jan J. Lobederio, nanunungkulang puno ng PHACTO, ang mga manlalakbay na tikman ang mga kilalang pagkaing lokal ng Bulacan, tuklasin ang mga likhang-kamay na produkto, at suportahan ang mga lokal na negosyo at artisan sa pamamagitan ng pagbili ng mga produktong gawang Bulakenyo.
โHinahikayat din namin ang publiko na tangkilikin ang mga tourism establishments at serbisyo na akreditado ng Department of Tourism upang matiyak ang ligtas at maaasahang karanasan sa paglalakbay,โ dagdag niya.
Pinaalalahanan din ng PHACTO ang mga motorista at manlalakbay na unahin ang kaligtasan sa kalsada sa pamamagitan ng maagang pagpaplano ng biyahe at pagsubaybay sa mga traffic advisory, lalo na sa mga lugar na inaasahang makararanas ng matinding trapiko sa kasagsagan ng paglalakbay. Pinapayuhan ang mga drayber na tiyaking maayos ang kondisyon ng kanilang sasakyan at mahigpit na sundin ang mga batas trapiko, habang ang mga commuter na gumagamit ng pampublikong transportasyon ay hinihikayat na gumamit ng mga awtorisadong serbisyo at maging mapagmatyag sa kanilang mga personal na gamit.
Sa oras ng emergency, maaaring makipag-ugnayan ang publiko sa Bulacan Rescue Hotline 911 o sa Provincial Disaster Risk Reduction and Management Office ng Bulacan sa telepono bilang 0905-333-3319 o 0942-367-1455, o humingi ng tulong sa pinakamalapit na himpilan ng pulisya o tanggapan ng barangay.
