Isinulong ni Sen. Joel “TESDAMAN” Villanueva na gawing Php 1,000 na ang buwanang social pension para mga senior citizens, at sinabing ito ang pinakamaliit na bagay na pwedeng gawin ng gobyerno para sa sektor na isa sa mga pinaka-apektado ng pandemya, pagtaas ng presyo ng langis, at ng inflation.
“Hindi po sapat ang kasalukuyang Php 500 monthly allowance para sa mga pang-araw-araw na pangangailangan at gamot ng ating mga nakakatandang Pilipino. Pangalawang taon na po ng pandemya, nagtaasan na po ang mga presyo ng bilihin, pero wala pa ring umento sa kanilang pensyon. Parangalan at respetuhin po natin sila sa pamamagitan ng mas maayos na pensyon,” sabi ng senador.
Bilang subcommittee chair ng Senate Committee on Social Justice, Welfare and Rural Development on the Senior Citizen Social Pension Bills, dininig ni Villanueva noong Enero ang walong panukalang batas na nagdadagdag ng mga benepisyo para sa mga indigent senior citizens.
Inulit ng senador ang kanyang panawagan para sa umento sa pensyon sa isang pagpupulong kasama ng mga senior citizens sa Quezon City ngayong araw (Abril 21), kung saan sinabi rin niya na mahigit isang dekada nang hinihintay ng mga senior citizen ang dagdag pensyon mula nang maisabatas ang Expanded Senior Citizens Act of 2010.
“Hindi na po dapat tayo naghihintay ng isa pang dekada o isa pang pandemya para lang paginhawahin ang nalalabing panahon ng ating mga lolo at lola,” sabi ni Villanueva.
Binanggit din ng senador na inuutos ng Senate Bill No. 2506 sa ilalim ng Committee Report No. 597 na suriin ng Department of Social Welfare and Development (DSWD) ang halaga ng pensyon kada dalawang taon batay sa umiiral na consumer price index ng Philippine Statistics Authority at iba pang economic indicators.
“In fact, dapat talagang may review kada dalawang taon ayon sa Expanded Senior Citizens Act. Kung maisabatas ito, sisiguruhin natin na regular ang pagpapatupad ng pagusuri para angkop sa panahon ang pensyon,” sabi ni Villanueva
Umaasa rin ang senador na pumasa ang panukalang batas sa pagbabalik ng Kongreso matapos ang halalan sa Mayo.
Batay sa datos ng DSWD, aabot sa mahigit 3.8 milyon ang indigent Filipinos na may edad 60 at pataas. Sa Php 500 kada buwan, nasa Php 23.6 bilyon kada taon ang allotment para sa social pension.
“Para sa bansang labis ang pagpapahalaga sa ating mga lolo at lola, hindi naman po siguro kalabisan na madoble ang allotment na ito kada taon. Huwag na nating patagalin ang pagbigay sa kanila ng karampatang respeto at dignidad,” sabi ni Villanueva.
Si Villanueva din ang co-author ng Republic Act No. 11350, o ang National Commission of Senior Citizens Act, na tinitiyak ang full implementation ng mga batas, polisiya, at programa para sa mga senior citizen.
