OCD at DILG, isinusulong ang Magna Carta for Rescue Workers


by Eloisa Samonte-Silverio
Personal na nakiramay si Department of Interior and Local Government (DILG) Secretary Benjamin Abalos Jr. sa pamilya ng limang rescuers sa Bulacan na namatay sa kasagsagan ng bagyong ‘Karding’ kung saan sinabi nito kay Governor Daniel Fernando na susuportahan nito ang pagkakaroon ng tiyak na benepisyo, sahod at kaligtasan ng mga rescuers sa pamamagitan ng pagsusulong ng Magna Carta for Rescue Workers. (ERICK SILVERIO)
ISINUSULONG  at nanawagan ang Office of the Civil Defense (OCD) sa Kongreso na magkaroon ng Magna Carta for Rescue Workers upang ganap na mapangalagaan ang kapakanan ng mga rescuers at matiyak ang naangkop na sahod at benepisyo sa mga ito.
 
Suportado rin ni Department of Interior and Local Government (DILG) Secretary Benjamin Abalos Jr. ang nasabing pagsusulong ng panukala dahil naniniwala ang kalihim na lalong maiaangat din nito ang antas ng kasanayan ng mga provincial, city at municipal DRRMs.

 

Sa mensahe ni Undersecretary Raymundo Ferrer, administrator ng Office of the Civil Defense (OCD), sa kanyang pakikiramay sa mga pamilya nina Narciso Calayag Jr., Troy Justine Agustin, George Agustin, Marby Bartolome at Jerson Lopez Resureccion sa Bulacan Capitol Gymnasium sa lungsod ng Malolos, Bulacan, sinabi nito na panahon na para bigyan ng maayon na pagkalinga sa mga rescuers kaugnay ng sinapit na trahedya ng limang Bulacan PDRRMO rescuers na nagbuwis ng buhay habang ginagampanan ang kanilang tungkulin.

 

Aniya, ito ang dapat na magiging katambal ng panukalang pagtatatag ng isang Department of Disaster Resilient upang ganap na maging moderno at mas malakas ang National Disaster Risk Reduction Management Office (NDRRMO) ng Pilipinas.  

 

Bumisita at nakiramay rin si Sec. Abalos at sinabi nito na hihilingin niya sa Kongreso na maamyendahan ang umiiral na National Building Code na akma sa tindi ng mga bagyo ngayon dahil sa Climate Change.

Bagama’t nangyari itong trahedya sa limang Bulakenyong rescuers, kinikilala naman ng kalihim ang epektibong preemptive response ng Pamahalaang Panlalawigan ng Bulacan na maging mababa ang bilang ng mga karaniwang mamamayan na namatay dahil sa bagyo.

Ilan sa mga naitalang tulong sa mga namatayan ang tig-P500 libo mula Philippine Amusement and Gaming Corporation (PAGCOR) at tig-P200 libo mula sa Pamahalaang Panlalawigan ng Bulacan.

Iba pa rito ang mga abuloy mula sa iba’t ibang tanggapan ng mga kinatawan at senador sa Mababa at Mataas na Kapulungan ng Kongreso ng Pilipinas.

Inihatid naman ni Department of Social Welfare and Development (DSWD) Secretary Erwin Tulfo ang tulong pinansiyal na ipinadala ni Pangulong Ferdinand Romualdez Marcos Jr. Sinabi naman ng kalihim na hayaang maging pribado ang tulong na ibinigay sa direktiba na rin ng pangulo.

Sa pamamagitan ng OCD, nagkaloob ang NDRRMO ng tig-P10 libo sa kada isang pamilya na namatayan. 
 
Kabilang lamang ito sa maraming tulong na bumuhos mula sa pamahalaang nasyonal, lokal at iba’t ibang sektor.
Samantala, sinabi ni Gobernador Daniel R. Fernando na panahon na upang higit na mas seryosohin ang pangangalaga sa kalikasan. 
 
Base sa inisyal na ulat ng PDRRMO, itinuturong dahilan ng pagkamatay ng limang mga rescuers ang nangyaring flash flood habang nagsasagawa ng rescue operation sa kasagsagan ng bagyo.
Tinawagan din ng pansin ng gobernador ang National Irrigation Administration (NIA) upang malagyan ng check gate ang bagong tayong Bulo Dam sa Donya Remedios Trinidad at makumpuni ang nasirang rubber gate ng Bustos Dam. Ito’y upang maging matatag ang pagpigil sa pagragasa ng tubig kapag tumama ang isang malakas na bagyo. 
 
SOURCE: SHANE VELASCO (PIA3-Bulacan)
38