Ni: REGIE B. ARELLANO -Teacher II Romeo Acuña Santos Memorial High School
Maraming nabago at patuloy na binabago
Nitong Pandemyang gumimbal sa mundo.
Ang nakasanayang buhay pinipilit nating ibalik
Iba’t ibang pamamaraan, hinahanap. sinasaliksik.
Sa larangan ng edukasyon, tunay ngang naramdaman
Ang sistemang tipikal, ginawa ngayong teknikal
Blended learnings, modular at online classes pinairal
Maging ang mga meetings at seminars ginawa na ring virtual.
Ating bigyang pansin ang nabagong sitwasyon
Sa paningin ng mga bata’t magulang at ng guro sa ngayon.
Tiyak na mahirap ang agad nilang itutugon
Sa sandaling kumustahin ang kanilang kondisyon.
Ang bata bilang mag-aaral ngayo’y niyayakap
Ang paraan ng pagkatuto sa sariling pagsisikap
Katuwang marahil ang magulang o ibang miyembro ng pamilya,
Dili kaya ay internet, iba’t ibang platforms at social media.
Ang mga magulang sa ngayon ay may dagdag sakrispisyo
Na sa halip na gugulin ang oras sa gawaing bahay at ibang trabaho,
Sa pagkuha’t pagbalik ng modyul, naglalaan pa ng minuto at segundo
Bukod pa sa sila ngayon ang “teacher-in-charge” ni bata para matuto.
Ang mga guro naman, sa “new normal” na paraan
Aminin man o hindi, sa pagtanggap ay nahirapan.
Mayroon pa ngang ilan na depression ay naranasan
Dahil sa pagbabago ng takbo ng dating payak na kalagayan.
Hindi man natin alam kung kailan matatapos
Ang ganitong pamumuhay ni Juan Dela Cruz
Subalit sa pagsisikap at pagtutulungan nating makaraos
Huwag makakalimot sa Pagpapala at Pag-Ibig ng Diyos.
Kaya naman ang tangi nating panghahawakan sa ngayon
Ang isipang matatag at ang buhay na mahinahon
Pairalin parati ang panatag na loob
Bukas na hinahangad, makakamit sa pagbangon.
