LUNGSOD NG MALOLOS – Sa isang makabuluhang hakbang upang mapalakas ang ugnayan ng law enforcement at ng mga komunidad na kanilang pinaglilingkuran, pinangunahan kamakailan ng Bulacan Police Provincial Office (BPPO) ang cascading ng Community and Service-Oriented Policing (CSOP) system at ang pormal na deputasyon ng Local Chief Executives (LCEs) sa Hiyas ng Bulacan Convention Center sa lungsod na ito.
Binabago ng inisyatibang ito ang tradisyunal na “top-down” na pamamaraan ng pagpupulis tungo sa isang nagkakaisang puwersa kung saan ang mga mayor at gobernador ay hindi na lamang tagamasid, kundi pangunahing tagapagbalangkas ng kapayapaan at kaayusan. Sa pamamagitan ng pormalisasyon ng partnership na ito, tinitiyak ng BPPO na ang bawat operasyon ng pulisya ay nakaugat sa partikular na pangangailangan at kalagayan ng mga lokal na pamahalaang kanilang sinasakupan.
Sa mensaheng inihatid ni NAPOLCOM Regional Director Evangeline R. Almirante, ipinaliwanag ni Commissioner Rafael Vicente R. Calinisan na ang deputasyon ng mga lokal na pinuno ay isang profound legal entrustment at hindi lamang isang pormalidad.
“Bilang mga kinatawan ng National Police Commission, ang ating Local Chief Executives ang pangunahing lider ng pamahalaan sa pagtiyak ng epektibong pagpupulis sa loob ng kanilang nasasakupan,” ani Comm. Calinisan.
Binigyang-diin niya na ang pulisya ay hindi kumikilos nang hiwalay, kundi gumaganap ayon sa strategic direction na itinatakda ng lokal na pamunuan, kaya’t ang seguridad ng lalawigan ay tuwirang nasa pangangasiwa ng mga halal na opisyal.
Inaasahan ang mga lokal na punong ehekutibo na magbigay ng strategic directionpara sa pampublikong kaligtasan, magmobilisa ng mga barangay at lokal na ahensya, isama ang mga inisyatibang pangkaligtasan sa mga plano at badyet sa kaunlaran, at tiyakin ang pananagutan sa loob ng hanay ng pulisya.
Ibinahagi naman ni Gobernador Daniel R. Fernando, na kinatawan ni Chief-of-Staff Abgd. Nikki Manuel Coronel, na ang tagumpay ng kolaborasyong ito ay lubos na nakasalalay sa ugnayan ng pamahalaan at ng pinamumunuan nito.
“Kapag ang pamamahala ay nakabatay sa pananagutan, pagiging bukas, at mahigpit na pagsunod sa batas, kusang sumusunod ang tiwala ng taumbayan. At kung may tiwala ang mamamayan, higit na nagiging epektibo ang pagpapatupad ng batas at pagpapanatili ng kaayusan,” aniya, habang binibigyang-diin ang kapangyarihan ng transparency sa pagbuo ng mas ligtas na lalawigan.
Dagdag pa rito, tinalakay sa mismong seminar ang Deputation of Local Chief Executives na ipinresenta ni Dir. Arlene Castro-Co, Deputy Executive Director ng NAPOLCOM, at ang Community and Service-Oriented Policing kasama ang mahahalagang probisyon ng CSOP Memorandum of Agreement na ipinaliwanag ni Abgd. Rominagrace A. Yadao, Provincial Officer ng NAPOLCOM Bulacan.
Nagkaroon din ng open forum kung saan nagkaroon ng pagkakataon ang mga kalahok na maglahad ng mga katanungan at linawin ang kani-kanilang mga tungkulin na sinundan ng pamamahagi ng mga sertipiko na pinangunahan nina Dir. Evangeline R. Almirante, Regional Director ng NAPOLCOM Regional Office III, at Abgd. Yadao.
Sa pamamagitan ng CSOP, napatitibay ang pagpupulis bilang isang coordinated at people-centered na nakaugat sa pamumuno, kolaborasyon, at pakikibahagi ng komunidad.
