Nanawagan si Senador Joel Villanueva nitong Huwebes na istriktong ipatupad ang inilabas na kautusan ng Bangko Sentral ng Pilipinas (BSP) na humihikayat sa mga bangko na tanggalin ang digital fund transfer fees kasabay ng pagpapatupad ng loan relief measures para sa mga borrowers o umuutang na tinamaan ng kasalukuyang energy crisis.
Sinabi ni Villanueva, chairperson ng Senate committee on banks, na napapanahon ang ganitong hakbang at magandang simula para sa isang pangmatagalang reporma.
“The BSP is doing exactly what a responsible central bank should do in a crisis, making it easier, not harder, for ordinary Filipinos to move money,” sabi ni Villanueva.
“We cannot keep relying on emergency waivers and moral suasion. Consumers deserve protection that does not disappear when the crisis passes,” dagdag niya.
Sa ilalim ng Monetary Board Resolution No. 296 na may petsang Abril 8, 2026, pinahihintulutan ng BSP ang mga bangko na pahabain ang grace period o palugit para sa loan payment ng hanggang anim na buwan lalo na sa mga direktang naapektuhan ng State of National Energy Emergency na idineklara noong Marso 24, 2026.
Makakakuha rin ng higit na kaluwagan ang mga agricultural borrower dahil ipinagpapaliban ng hanggang isang taon ang pagbabayad ng kanilang utang, batay sa pagtatasa o assessment ng mga bangko.
Maliban sa loan relief, hinimok din ng BSP ang mga bangko at e-money service provider na pansamantalang suspendihin ang fees at charges sa online banking platforms, kabilang ang InstaPay at PESONet electronic funds transfer.
Makaka-engganyo sa mga konsyumer ang mas mababang bayarin sa mga digital transaction na huwag ng magtungo sa mga bangko at payment centers ngayon may krisis sa enerhiya.
Pumukaw sa atensyon ni Villanueva ang apelang ito ng BSP na bagamat boluntaryong ipatutupad, humihingi ito nang madaliang aksyon sa mga bangko. Pinapakita rin nito ang gap o puwang sa ating mga kasalukuyang polisiya.
“Every time there is a crisis — a pandemic, an oil shock — the BSP scrambles to convince banks to waive transfer fees, and banks treat it as optional. That is the gap we need to close,” ani Villanueva.
