NORZAGARAY, Bulacan – Lalo pang mapapalakas ang suplay ng tubig sa Bulacan, Rizal at Metro Manila ngayong pormal nang pinasinayaan ni Pangulong Ferdinand R. Marcos Jr. ang bagong baon na Tunnel 5 ng Angat Water Transmission Improvement Project.
Isang pangunahing proyektong pantubig ang P3.2 bilyong halaga ng Tunnel 5 na itinaguyod ng Metropolitan Waterworks and Sewerage System (MWSS) sa pamamagitan ng magkatulong na pagpopondo ng mga konsesyonaryo nitong Maynila at the Manila Water, sang-ayon sa umiiral nilang bagong konsesyon na itinakda ng Republic Act 11600 at Republic Act 11601.
Ayon kay MWSS Administrator Leonor Cleofas, patunay ang proyektong ito sa aktibong public-private partnership sa water sector na magkasamang tumutugon sa pangunahing pangangailangan ng taong bayan sa inuming tubig.
Direktang makikinabang aniya rito ang karaniwang mga tahanan, establisemento at industriya sa Bulacan, Rizal at Metro Manila sa pamamagitan water increased system capacity, utilization of the water system’s full design capacity, at magsisilbing bagong daanan ng tubig sa panahong magsimula ang rehabilitasyon ng mga tunnels 1, 2 at 3.
Naibaon noon pang mga 1930s o sa panahon ng Pamahalaang Commonwealth, ang unang tatlong mga tunnels na nangangailangan ng rehabilitasyon o mapalitan.
Sa pahayag ni Pangulong Marcos, “maisasaayos ang mga dati nang tunnels dahil may backup ng puwedeng pagdaanan ng tubig. ‘Yung mga tunnel po na sinara dahil kailangan nang mag-maintenance, maaari na ngayon natin buksan o balikan ulit, baka may pag-asa pa, baka may rehab pa para magamit pa rin natin. Mas magiging handa ang ating mga komunidad sa panahon ng tagtuyot at iba pang epekto ng ating hinaharap na climate change.”
Kapag natapos ang nasabing rehabilitasyon, mananatili ang Tunnel 5 at ang katabi nitong Tunnel 4, bilang mga permanenteng istraktura kaya’t mas maraming tunnel ang hihigop ng tubig sa Ipo Dam. Mas napatibay pa nito ang watershed area sa mga panahon ng kalamidad.
May habang 6.4 kilometer ang tunnel na ito na may lapad na 4.3 meter on diameter, ang nakabaon mula sa Ipo Dam patungo sa Bigte Basin na ginawa ng China International Water and Electric Corporation (CWE).
Kaya nitong makapag-imbak ng 1,642 bilyong litro ng tubig kada araw. Ang sistema, nagsisilbing transmission dam ang Ipo Dam ng mga alokasyon para sa inuming tubig mula sa Angat Dam na pawang nasa Norzagaray, Bulacan.
Mula sa Bigte Basin sa bayang ito, ang mga naimbak na tubig mula sa Ipo Dam ay pinadadaloy sa mga Aqueducts. Taong 2012, nang buksan ang bagong aqueduct 6 na pinondohan ng China noong 2006 para sa Umiray-Angat-Ipo-La Mesa system.
Pinakikinabangan na ito ng mga taga West Metro Manila at Cavite sa pamamagitan ng Maynilad, East Metro Manila at Rizal na sakop ng konsesyon ng Manila Water at sa Bulacan sa tulong ng Bulacan Bulk Water Supply Project of Luzon Clean Water Corporation ng San Miguel Corporation.
Kaugnay nito, patuloy naman ang konstruksiyon ng Aqueduct 7 na itinatayo rin ng CWE sa tulong ng Asian Development Bank (ADB). Target namang pasimulan ang pagbabaon ng bagong tunnel sa kasalukuyang lokasyon ng Tunnel 1 sa taong 2026.
Samantala, sinabi ni Department of Environment and Natural Resources (DENR) Secretary Raphael Lotilla na ang mga ganitong uri ng proyekto ay mapapakinabangan kahit umabot pa na lagpas sa taong 2050.
Kaya’t makatwiran aniya na mapaigting ang pangangalaga sa buong watershed, tiyaking hindi mapuputol ang mga puno at hindi maging kontaminado ang kalidad ng tubig.
